Хан-Уул дүүргийн 11 дүгээр хороо, Туул гол дээгүүрх Зайсангийн зүүн гүүрийг 2024 онд нурааж, өнгөрсөн онд шинэ гүүрийг ашиглалтад оруулсан билээ.
Харин баруун талын гүүрний авто замын хучилтын ажлыг энэ сард засварлахаар болжээ.
Энэ тухай Нийслэлийн Замын Хөгжлийн Газраас мэдээлснээр Зайсангийн баруун гүүрний 250 метр урт авто замын хөдөлгөөнийг наймдугаар сарын 7-ны 23:00 цагаас эхлэн наймдугаар сарын 10-ны 06:00 цаг хүртэл хааж, асфальтбетон хучилтыг засварлахаар болсон байна.
Баруун гүүрний засварын ажлыг “ЗМЗ” ХХК гүйцэтгэх аж.
2022-2026 онд Зайсангийн зүүн, баруун төмөр бетон гүүрний өргөтгөл, шинэчлэлтийн нийт төсөвт өртөг ₮41.1 тэрбум бөгөөд энэ онд баруун гүүрний засварын ажилд Замын сангийн хөрөнгөөс ₮3.5 тэрбумыг зарцуулахаар баталжээ.