“Counter Strike 2” тоглоомын манай улсын “The MongolZ” баг М.Азбаяр буюу “Senzu”-г сэлгээнд суулгаж буйгаа өнгөрсөн шөнө зарласан.
Тэгвэл түүнийг сэлгээнд суух хугацаанд “controlez” буюу Баасанжаргалын Өнөдэлгэр “The MongolZ” баг тоглохоор болсон байна. Тэрбээр зөвхөн арваннэгдүгээр сарын 3-9-нд БНХАУ-д зохион байгуулагдах “Intel Extreme Masters Chengdu 2025” тэмцээнд тоглох аж.
Өдгөө 28 настай Б.Өнөдэлгэр нь 2017 оноос хойш “Counter Strike 2” тоглоомын мэргэжлийн түвшинд өрсөлдөж байгаа бөгөөд 2017 оны арваннэгдүгээр сард “The MongolZ” багт түр хугацаанд тоглож байжээ. Тэрбээр “Chinggis Warriors” багийн ахлагчийн хувиар өнгөрсөн зургаадугаар сард зохиогдсон “BLAST.tv Austin Major 2025” дэлхийн аваргад оролцож байсан туршлагатай юм.
“The MongolZ” багийн удирдлагуудын зүгээс Б.Өнөдэлгэрийг багт түр хугацаанд тоглуулахаар болсон талаар “Академийн багийн тоглогчдын чадавхыг бүрэн үнэлэхэд хангалттай хугацаа байгаагүй тул үндсэн багийн саналыг харгалзан туршлагатай тоглогчийг уг тэмцээнд оролцуулахаар шийдвэрлэлээ” хэмээн цахим хуудсандаа бичжээ.