Хөвсгөл аймгийн Тариалан сумын Баянхошуу багийн “Сайхан мод” гэдэг газраас хоёр настай хүү 2025 оны есдүгээр сарын 17-нд сураггүй алга болсон.
Хүүг мэргэжлийн байгууллагуудын алба хаагчид болон гэр бүлийнхэн нь, орон нутгийн иргэд эрэн хайсаар өнөөдөр хүүгийн цогцос олдсоныг Цагдаагийн Ерөнхий Газар(ЦЕГ)-аас мэдэгдлээ.
ЦЕГ-ын Хэвлэл мэдээллийн төвийн ахлах мэргэжилтэн, цагдаагийн хошууч С.Баярбилэг “Энэ оны есдүгээр сарын 17-нд Хөвсгөл аймгийн Тариалан суманд хоёр настай хүүхэд алга боллоо гэсэн мэдээлэл анх бүртгэгдсэн. Мэдээллийн хүрээнд төрийн чиг үүрэг бүхий байгууллагууд, иргэд, олон нийтийн хамтарсан эрэн хайх ажиллагааг зохион байгуулан ажиллалаа.
Түүнчлэн тэрбээр “Тухайн газар нь мод, тал хосолсон байна. Одоогоор үзлэг шалгалт хийж байгаа учраас шинжээчийн дүгнэлтийн дараа мэдээлэл өгөх боломжтой. Мөрдөн шалгах ажиллагааны явцад тухайн нөхцөл байдалд эрэн хайх ажиллагаа хийгдсэн үү, тэр үедээ олох боломжгүй газарт байсан уу зэрэг нь давхар шалгагдана” гэсэн юм.
Хоёр настай хүүгийн уг хэрэгт шинжээчийн дүгнэлт гарах учиртай. Шинжилгээний цар хүрээнээс хамаарч дүгнэлт гарах хугацаа харилцан адилгүй гэдгийг ЦЕГ-аас мэдэгдлээ.